नेपाल सुपर लिग (एनएसएल) २०२३ अन्तर्गत आज डबल हेडर डे अर्थात दुई खेल हुँदैछन् ।
यसअघि नै प्लेअफमा स्थान पक्का गरिसकेको पोखरा थण्डर्स र दोस्रो स्थानको धनगढी एफसीबीच शीर्ष बन्ने होडमा प्रतिस्पर्धा हुँदैछ । यो खेल त्रिपुरेश्वरस्थित दशरथ रंगशालामा दिउँसो १ बजे सुरु हुनेछ ।
पोखरा ७ खेलबाट १४ अंकसहित शीर्ष स्थानमा छ र धनगढीसँग जित वा बराबरीले पनि पोखरा शीर्ष स्थानमै रहने पक्का छ । तेस्रो स्थानको ललितपुर सिटी र चौथो स्थानको झापा एफसीको समान १० अंक भएकोले पोखराले कम्तीमा शीर्ष दुईमा स्थान पक्का गरिसकेको छ र पहिलो क्वालिफायर खेल्नेछ ।
उता धनगढीले प्लेअफमा स्थान पक्का बनाएपनि शीर्ष स्थानमा पुग्न पोखरालाई हराउनुपर्नेछ । धनगढीको ७ खेलबाट १२ अंक छ । पोखरालाई पराजित गरेमा धनगढी शीर्ष स्थानमा पुग्नेछ र शीर्ष दुईमा रहँदै पहिलो क्वालिफायर खेल्ने पक्का हुनेछ ।
यस्तै दशरथ रंगशालामै साँझ ५ बजे सुरु हुने खेलमा झापा एफसी र एफसी चितवनबीच प्रतिस्पर्धा हुनेछ । झापा ७ खेलबाट १० अंकसहित चौथो स्थानमा छ । चितवन समान खेलबाट ६ अंकसहित अन्तिममा छ ।
चितवनलाई पराजित गरेमा झापाले १३ अंक जोड्दै प्लेअफमा स्थान पक्का गर्नेछ । बराबरीले झापाको ११ अंक हुनेछ र प्लेअफ पुग्न त्यो अंक समेत पर्याप्त हुन् सक्छ यदि अन्य खेलको नतिजा आफू अनुकूल आएमा ।
झापा चितवनसँग पराजित भएमा पनि शीर्ष चारमा रहने अवसर हुनेछ । तर त्यसका लागि शनिवार हुने खेलमा काठमाडौं ललितपुरसँग पराजित हुनुपर्नेछ भने वीरगञ्ज युनाइटेड बुटवल लुम्बिनीसँग पराजित हुनुपर्नेछ ।
चितवनका लागि भने अन्तिम खेल प्रतिष्ठाको लागि हुनेछ । ७ मध्ये जम्मा १ खेल जितेको चितवन प्लेअफ होडबाट बाहिरिसकेको छ र ६ अंकसहित अन्तिममा छ ।
