इजरायलमा प्यालेस्टाइनी विद्रोही समूह हमासले आक्रमण गरेपछि इजरायलमा काम गर्न गएका नेपाली विद्यार्थीहरु नेपाल फर्किन चाहेका छन् ।
अहिले पनि विभिन्न ठाउँमा मिसाइलहरु आक्रमण भैरहेकाले सरकारले चाँडै उद्धार गरेर स्वदेश फर्काइदिओस् भन्ने उनीहरुको माग छ ।
स्थानीय समय अनुसार शनिबार बिहान ६ बजेबाट नै इजरायल माथि प्यालेस्टाइनी विद्रोही समूहले आक्रमण सुरु गरेको कृषि अध्ययन र कामका लागि गएका नेपाली विद्यार्थी सुरज भण्डारीले बताए ।
परराष्ट्र मन्त्रालयका अनुसार घटनामा १४ जना नेपाली काम गर्ने एक कृषि फार्ममा आक्रमण हुँदा ९ जना घाइते भएका र तीमध्ये दई जनाको अवस्था गम्भीर छ । एग्रिकल्चरको किवुज कम्युनिटीमा काम गर्ने विद्यार्थी घाइते भएको जनाइएको छ ।
घटनास्थलबाट करीव ३० किलोमिटर पर रहेको सोरासिम नर्सरी फार्ममा काम गर्ने चितवन भरतपुरका युदिन ढकालले आफूहरु अहिले पनि बंकरमा नै बसिरहेको बताए । उनको फार्ममा काम गर्ने १८ जना नेपाली बंकरमा नै बसिरहेको र अहिलेसम्म कसैले पनि सहयोग नगरेको गुनासो गरे । ‘हाम्रो उद्धार कतिबेला होला भनेर पखाईमा छौं,’ अनलाइनखबरसँग कुराकानी गर्दै युदिनले भने, ‘हामीले आफूले ल्याएको केही खाने कुरा खायौं ।’
घटना भएको स्थल नजिकै सुदूरपश्चिम विश्वविद्यालयबाट गएका विद्यार्थीहरुसमेत परेको जानकारी आएको भण्डारीले बताए ।
चितवनको कृषि तथा वन विज्ञान विश्वविद्यालय, सुदूरपश्चिम विश्वविद्यालय र त्रिभुवन विश्वविद्यालयबाट कृषि, पशु विज्ञान तथा पशु चिकित्सा र वन संकायमा अध्ययन गर्ने विद्यार्थीहरु इजरायल गएका छन् । कृषि विश्वविद्यालयबाट १ महिना अगाडि तथा त्रिवि र सुदूरपश्चिम विश्वविद्यालयबाट २५ दिन अगाडि मात्रै विद्यार्थीहरु पढ्दै काम गर्न भनेर इजरायल गएका हुन् ।
उनीहरु हप्तामा एक दिन पढाइ र बाँकी दिन काम गर्ने गरी नेपालबाट इजरायल गएका थिए । विद्यार्थीहरुलाई विभिन्न फार्ममा बाँडेर ५ जनादेखि ३४ जनासम्मलाई राखेर काममा लगाइएको थियो ।
इजिप्ट नजिकैको सीमा क्षेत्रमा केही सुरक्षित जस्तो भए पनि बाँकी ठाउँमा कहाँ, कतिबेला, के हुन्छ भन्न सक्ने अवस्था नरहेको भण्डारीले बताए ।
उनका अनुसार गाँजापट्टी नजिकै क्षेत्रमा रहेका फार्ममा काम गर्नेहरु बढी जोखिममा छन् । ‘हामीहरु अहिले दूतावासको सम्पर्कमा छौं,’ भण्डारीले भने, ‘तर कतिपय साथीहरु बंकरमा नै बसेको र कोही घाइते भएकाले एकिन अवस्था छैन ।’
उनले आफूहरु केही सिक्न र केही काम गर्नका लागि इजरायल आएको तर दुई देशबीचको लडाइँको चपेटामा परिने खतरा भएकाले स्वदेश फर्किन चाहेको बताए । ‘सबै विद्यार्थीहरु त्रसित र भयभित भएको अवस्था छ, आफूसँग भविश्य नभएर आएको हैन,’ भण्डारीले भने, ‘चाँडोभन्दा चाँडो स्वदेश फर्किन चाहान्छौं ।’
इजरायलमा भएको आतङ्ककारी हमलामा घाइते भएका ९ मध्ये दुई जना नेपाली दूतावासको सम्पर्कमा आएका छन् । यद्यपि उनीहरूको हालसम्म उद्धार भने हुन सकेको छैन ।
गैर आवासीय नेपाली सङ्घ (एनआरएनए) इजरायलका पूर्व अध्यक्ष दीपक ओलीले दाङका हिमाञ्चल कट्टेल र अर्का नेपाली प्रवीन डाँगी आफूहरूको सम्पर्कमा आएको बताए ।
उनीहरू बोल्न सक्ने अवस्थामा रहे पनि अन्य ७ जना भने बेहोस अवस्थामा रहेको ओलीले बताए । उनका अनुसार ७ जनालाई बङ्करमा छिर्नुअघि नै गोली लागेको जानकारी प्राप्त भएको छ ।
डाँगी र कट्टेलले ७ जनालाई बङ्करभित्र छिर्नुअघि नै आतङ्ककारीहरूले गोली हानेको रिपोर्टिङ गरेका छन् । ७ जनालाई गोली लागेको छ भने अहिलेसम्म उपचारविहीन अवस्थामा बङ्करमै छन् ।
घटनामा परेका नेपालीहरू इजरायल प्यालेस्टाइन सीमा क्षेत्रमा रहको गाजा क्षेत्रको कृषि फार्ममा कार्यरत रहेको खुलेको छ । फार युनिभर्सिटी अन्तरगतको कृषि फार्ममा उनीहरू प्राक्टिकल गर्नेहरू रहेको बताइएको छ ।
सो कृषि फार्ममा १७ नेपाली कार्यरत रहेको बताइएको छ । अन्य भने साइरन बजेसँगै बङ्करमा छिर्न भ्याएपछि जोगिएको बताइएको छ ।
घटनास्थलमा स्थानीय समयअनुसार बिहान ६ बजेतिर साइरन बजेको थियो । साइरन बजेको ६० सेकेन्डको टाइम बंकरमा पुग्नुपर्ने हुन्छ । तर बङ्करमा जाँदाजाँदै फिजिकलीरुपमै आएका आतंककारीले गोली हान्दा ७ घाइते भएका हुन् । तर, दुई जनालाई गोली लागेको छैन । उनीहरूलाई चोटपटक भने रहेको बताइएको छ ।
अहिले पनि घटना भएको क्षेत्र आतङ्ककारीकै नियन्त्रणमा रहेको बताइएको छ भने इजरायली सेनाले घटनास्थललाई नियन्त्रणमा लिने प्रयास गरिरहेको छ । इजरायलस्थित नेपाली दूतावासले एनआरएनएसहितको समन्वयमा आवश्यक सम्पर्क स्थापितको प्रयास गरिरहेको छ। यद्यपि अहिलेसम्म घाइतेहरूले घटनाको ७ घण्टा बित्दा पनि उपचार भने पाउन नसकेको ओलीको भनाइ छ ।
यसैबिच बीबीसीका अनुसार दर्जनौँ इजरायलीहरूलाई प्यालेस्टिनी विद्रोहीहरूले इजरायली भूमिमा आक्रमण गरी कब्जामा लिएको अनुमान गरिएको छ । घटनामा कम्तिमा ४० जनाको मृत्यु भएको पुष्टि भइसकेको छ भने सयौँ घाइते भएको इजरायली अधिकारीहरूले बताएका छन् ।
घटनापछि इजरायलले पनि जवाफी कारबाही गरेको छ । जवाफी कारबाहीमा गाजा पट्टीमा करिब २०० जनाको मृत्यु भएको अधिकारीहरूले बताएका छन्।
